ತಾಯಿಯನ್ನು ಪದಗಳಲ್ಲಿ ವರ್ಣಿಸಿದ ಪ್ರೀತಿ ಟಿ ಎಸ್
ದಾವಣಗೆರೆ: (ಕವನ – ಕಾಲಂ)
ಅವ್ವ…!
ಅವ್ವ ಮಲಗಿದ್ದಳು
ಕುಡಿ ದೀಪದೆದುರು
ಬದುಕ ಬೆಳಕಾಗಿ ಸೂಸಿ
ಉರಿಉಂಡು ನೊಂದು ||1||
ನೀರವ ಮೌನವ
ನಡುವೆ ಬೆಚ್ಚಿಸಿದ
ಮಿಂಚು ಗುಡುಗು
ಅವ್ವನ ಎಬ್ಬಿಸದಾದವು ||2||
ಕುಯ್ಗುಡ್ಲು ಹಿಡಿದು
ಹೊಲದಲ್ಲಿ ಕಳೆಕಿತ್ತು
ನೆತ್ತಿ ಸುಡುವ ಬಿಸಿಲಲ್ಲಿ
ಹಣೆ ತುಂಬ
ಹನಿಮುತ್ತ ಹೊತ್ತು
ಅವ್ವ ದಣಿದಿದ್ದಳು ||3||
ಹನಿಮುತ್ತ ಚೆಲ್ಲಿ
ಹೊಲವೆಲ್ಲಾ ರಾಶಿರಾಶಿ
ತೆನೆಹೊತ್ತು ನಿಂತೈತೆ
ತಲೆಬಾಗಿ
ಅವ್ವ ಮಲಗಿದ್ದಾಳೆ
ಅಲ್ಲೀಗ ||4||
ಹೊಲ ಕುಯ್ದು
ಹೊಲ ಕಟ್ಟಿ
ಉಸಿರ ಬಿಗಿಹಿಡಿದು
ಹೊರೆ ಹೊತ್ತಿದ್ದಳು
ಅವ್ವ ಪ್ರತಿಸಾರಿ ||5||
ಈಗ ಹೀಗಿಲ್ಲ
ಈಗಷ್ಟೇ ಮಲಗವಳೇ
ಹೊತ್ತು ಮುಳುಗುವ ಮುನ್ನ
ಬೆಚ್ಚಗೆ ಈ ಮಣ್ಣಿನ ಒಡಲಲ್ಲಿ ||6||
– ಪ್ರೀತಿ.ಟಿ.ಎಸ್, ಬರಹಗಾರ್ತಿ
