ಮಣ್ಣಿಗೆ ಸಾವಯವ ಇಂಗಾಲದ ಪ್ರಯೋಜನ

ದಾವಣಗೆರೆ: ಬಿರುಬಿಸಿಲಿಗೆ ಬೆಂಡಾಗಿ ಬಸವಳಿದಿರುವ ನಮ್ಮ ಮಣ್ಣುಗಳು ದಾಹ ಮತ್ತು ಹಸಿವಿನಿಂದ ಕಂಗೆಟ್ಟಿದೆ. ಶಾಶ್ವತವಾಗಿ ಈ ಮಣ್ಣುಗಳ ಬಾಯಾರಿಕೆ ಮತ್ತು ಹಸಿವು ನೀಗಿಸಲು ನಮ್ಮ ಮಣ್ಣುಗಳಿಗೆ ಸಾವಯವ ಇಂಗಾಲ ಸೇರಿಸುವುದೇ ಈಗಿರುವ ಏಕೈಕ ಪರಿಹಾರ. ನಮ್ಮ ಮಣ್ಣಿಗೆ ಒಂದು ಬಗೆಯ ರೂಪವನ್ನು ನೀಡಿ – ಚೇತರಿಕೆ ತುಂಬಿ – ತಾಕತ್ತು ತರುವ ಇಂಗಾಲಾಂಶದಿಂದ ಬಹುಬಗೆಯ ಪ್ರಯೋಜನಗಳಿವೆ.

ಸಾವಯವ ಅಂಶದ ರೂಪದಲ್ಲಿ ಮಣ್ಣಿಗೆ ಸೇರುವ ಸಾವಯವ ಇಂಗಾಲಾಂಶ ನಮ್ಮ ಮಣ್ಣನ್ನು ಸಜೀವಗೊಳಿಸುತ್ತವೆ.
ತನ್ನ ಒಡಲಲ್ಲಿರುವ ಪೋಷಕಾಂಶಗಳನ್ನು ಸಮರ್ಥವಾಗಿ ಬಳಸಿಕೊಳ್ಳುವ ಉತ್ಪಾದಕಾ ಘಟಕಗಳಾಗಿ ಮಣ್ಣನ್ನು ಪರಿವರ್ತಿಸುತ್ತವೆ.
ಮಣ್ಣಲ್ಲಿನ ಜೀವಾಣುಗಳಿಗೆ ಹಾಗೂ ಬೆಳೆಯುವ ಗಿಡಗಳಿಗೆ ಅಗತ್ಯವಾದ ಸಾವಯವ ಆಹಾರ – ಪೋಷಕಾಂಶಗಳನ್ನು ಹಂತಹಂತವಾಗಿ ಹಾಗೂ ಸಾವಧಾನದಿಂದ ಬಿಡುಗಡೆ ಮಾಡುತ್ತದೆ
ಅತೀ ಹೆಚ್ಚು ನೀರನ್ನು ಹೀರಿಕೊಳ್ಳುವ ಸಾಮರ್ಥ್ಯ ಹೊಂದಿರುವುದರಿಂದ, ತನ್ನಲ್ಲಿನ ತೇವಾಂಶವನ್ನು ಅಗತ್ಯ ಸಮಯದಲ್ಲಿ ಗಿಡಗಳಿಗೆ ನೀಡಿ, ಗಿಡಗಳು ಬಿಸಿಲಿನಿಂದ ಒಣಗುವುದನ್ನು ತಪ್ಪಿಸುತ್ತವೆ
ಮಣ್ಣಿನ ರಸಸಾರದ ಮಟ್ಟವನ್ನು ಸಮತೋಲನದಲ್ಲಿರಿಸುತ್ತದೆ
ಮಣ್ಣಲ್ಲಿನ ಕ್ಷಾರೀಯ ಹಾಗೂ ಆಮ್ಲೀಯ ಅಂಶವನ್ನು ತಗ್ಗಿಸುತ್ತದೆ
ಇಂಗಾಲಾಂಶ ಹೊಂದಿರುವ ಮಣ್ಣುಗಳು ದಟ್ಟವಾದ ಬಣ್ಣಗಳಲ್ಲಿರುತ್ತವೆ.
ಮಣ್ಣಲ್ಲಿ ಬೆರೆಯುವ ಸಾವಯವ ಅಂಶ ಮಣ್ನಿನ ಕಣಕಣಗಳನ್ನು (ಮರಳು – ಗೋಡು – ಜೇಡಿ ಕಣಗಳು) ಒಂದುಗೂಡಿಸುತ್ತವೆ. ಇದರಿಂದ ಮಣ್ಣು ಸವೆಯುವುದು ತಪ್ಪುತ್ತದೆ.
ಪೊಟ್ಯಾಸಿಯಂ, ಕ್ಯಾಲ್ಸಿಯಂ ಮತ್ತು ಮೆಗ್ನೇಷಿಯಂ ಮತ್ತಿತರ ಸಹಜ ಪೋಷಕಾಂಶಗಳನ್ನು ಮಣ್ಣಲ್ಲಿಯೇ ಬೆರೆಯುವಂತೆ ಮಾಡುವುದರ ಮೂಲಕ ಈ ಪೋಷಕಾಂಶಗಳು ಸೋರಿಕೆಯಾಗುವುದನ್ನು ತಡೆಯುತ್ತವೆ.