ರಿಯಾಯಿತಿ ದರದಲ್ಲಿ ಚಿನ್ನ ಖರೀದಿಸಲು ಆರ್ ಬಿ ಐ ನೀಡುತ್ತಿರುವ ಹೊಸ ಆಫರ್!
ಚಿನ್ನದ ಮೇಲಿನ ಹೂಡಿಕೆ ಎಂದಿಗೂ ನಷ್ಟವಾಗುವುದಿಲ್ಲ ಆದ್ದರಿಂದ ಆರ್ಬಿಐ ಸಾವರಿನ್ ಗೋಲ್ಡ್ ಬಾಂಡ್ (Sovereign Gold Bond Scheme) ಸ್ಕೀಮ್ನ 9 ನೇ ಆವೃತ್ತಿಗೆ 5 ದಿನಗಳ ಕಾಲ ಚಂದಾದಾರಿಕೆ ಆರಂಭವಾಗುತ್ತಿದೆ.
5 ದಿನಗಳ ಕಾಲಾವಕಾಶ
ಜನವರಿ 10, ಸೋಮವಾರದಿಂದ 5 ದಿನಗಳ ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್ನ 9 ನೇ ಆವೃತ್ತಿಗೆ ಚಂದಾದಾರರನ್ನು ಬರಮಾಡಿಕೊಳ್ಳಲು ಆರ್ಬಿಐ ಸಕಲ ಸಿದ್ಧತೆ ಮಾಡಿಕೊಂಡಿದೆ ಎಂದು ಜನವರಿ 7, ಶುಕ್ರವಾರ ತಿಳಿಸಿದೆ.
ಒಂದು ಗ್ರಾಂ ಚಿನ್ನದ ಬೆಲೆ ಎಷ್ಟು?
ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್ 2021- 22 ರ ಈ ಯೋಜನೆಯಲ್ಲಿ ಒಂದು ಗ್ರಾಂ ಚಿನ್ನದ ಬೆಲೆಯನ್ನು 4,786 ರೂ ಎಂದು ನಿಗದಿಪಡಿಸಲಾಗಿದೆ ಎಂದು ಆರ್ಬಿಐ ತಿಳಿಸಿದೆ. ಹೂಡಿಕೆದಾರರು ಈ ಸುವರ್ಣಾವಕಾಶವನ್ನು ಜನವರಿ 10 ರಿಂದ 14 ರವರೆಗೆ ಬಳಸಿಕೊಂಡು ಚಂದಾದಾರರಾಗಬಹುದು.
ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸಿದ್ರೆ ರಿಯಾಯಿತಿ
ಸಾವರಿನ್ ಗೋಲ್ಡ್ ಬಾಂಡ್ಗೆ ಆರ್ಬಿಐ ಒಂದು ಗ್ರಾಂಗೆ 4,786 ರೂ. ನಾಮಮಾತ್ರ ಮೌಲ್ಯವನ್ನು ನಿಗದಿಪಡಿಸಿದೆ. ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸುವವರಿಗೆ ಒಂದು ಗ್ರಾಂಗೆ 50 ರೂ. ರಿಯಾಯಿತಿ ನೀಡಲಿದೆ. ಈ ರಿಯಾಯಿತಿ ಪಡೆಯಲು ಚಂದಾದಾರಿಕೆ ಸಂಪೂರ್ಣ ಪಾವತಿ ಆನ್ಲೈನ್ನಲ್ಲೇ ಮಾಡಬೇಕು. ಹೀಗೆ ಆನ್ಲೈನ್ನಲ್ಲಿ ಅರ್ಜಿ ಹಾಕುವವರಿಗೆ ಒಂದು ಗ್ರಾಂ ಚಿನ್ನಕ್ಕೆ 4,736 ರೂಪಾಯಿ ಪಡೆದು ಬಾಂಡ್ ವಿತರಣೆ ಮಾಡಲಾಗುತ್ತದೆ ಎಂದು ಆರ್ಬಿಐ ಹೇಳಿದೆ.
ಕಳೆದ ವರ್ಷ ಆರ್ಬಿಐ ಸಾವರಿನ್ ಗೋಲ್ಡ್ ಬಾಂಡ್ 8ರ ಆವೃತ್ತಿಯ ಪ್ರತಿ ಗ್ರಾಂ ಚಿನ್ನದ ಚಂದಾದಾರಿಕೆಯ ಬೆಲೆಯನ್ನು 4,791 ರೂಪಾಯಿಗೆ ನಿಗದಿಪಡಿಸಿತ್ತು. ನವೆಂಬರ್ 29 ರಿಂದ ಡಿಸೆಂಬರ್ 3, 2021 ರವರೆಗೆ ಅವಕಾಶ ನೀಡಿತ್ತು.
ಬಾಂಡ್ ಎಲ್ಲಿ ಲಭ್ಯವಿರುತ್ತದೆ..?
ಭಾರತ ಸರ್ಕಾರದ ಪರವಾಗಿ ಆರ್ಬಿಐ ಬಾಂಡ್ಗಳನ್ನು ಬಿಡುಗಡೆ ಮಾಡುತ್ತದೆ. ಪಿಟಿಐ ವರದಿಯ ಪ್ರಕಾರ ಬ್ಯಾಂಕ್, ಸ್ಟಾಕ್ ಹೋಲ್ಡಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್ (ಎಸ್ಎಚ್ಸಿಎಲ್) , ಕೆಲವೊಂದು ನಿಗದಿಪಡಿಸಿರುವ ಅಂಚೆ -ಕಚೇರಿ, ಮಾನ್ಯತೆ ಪಡೆದ ಸ್ಟಾಕ್ ಎಕ್ಸ್ಚೇಂಜ್ಗಳು , ಎನ್ಎಸ್ಇ ಮತ್ತು ಬಿಎಸ್ಇ ಮೂಲಕ ಬಾಂಡ್ಗಳನ್ನು ಮಾರಾಟ ಮಾಡುತ್ತದೆ.
ಸಾವರಿನ್ ಗೋಲ್ಡ್ ಬಾಂಡ್ ಬಗ್ಗೆ ನೀವು ತಿಳಿದುಕೊಳ್ಳಲೇಬೇಕಾದ ಅಂಶಗಳು
– 2015 ನವೆಂಬರ್ನಲ್ಲಿ ಕೇಂದ್ರ ಸರ್ಕಾರವು ಪ್ರಥಮ ಬಾರಿಗೆ ಸಾವರಿನ್ ಗೋಲ್ಡ್ ಬಾಂಡ್ ಯೋಜನೆಯನ್ನು ಆರಂಭಿಸಿತು.
-ಭೌತಿಕವಾಗಿ ಚಿನ್ನದ ಬೇಡಿಕೆಯನ್ನು ನಿಯಂತ್ರಿಸಲು ಮತ್ತು ದೇಶಿಯ ಉಳಿತಾಯದ ಭಾಗವನ್ನು ಆರ್ಥಿಕ ಸಮೃದ್ಧಿಗೆ ಉಳಿತಾಯದ ಮೂಲಕ ಉಳಿಸುವ ಉದ್ದೇಶ ಹೊಂದಿದೆ.
-ಈ ಯೋಜನೆಯಲ್ಲಿ ಚಿನ್ನ ನಿಮ್ಮ ಬಳಿ ಇರುವುದಿಲ್ಲ. ಡಿಜಿಟಲ್ ಗೋಲ್ಡ್ ಆಗಿರುತ್ತದೆ, ಬಾಂಡ್ ರೂಪದಲ್ಲಿರುತ್ತದೆ.
ಒಬ್ಬ ವ್ಯಕ್ತಿ ಒಂದು ಗ್ರಾಂನಿಂದ 4 ಕೆಜಿಯವರೆಗೂ ಈ ಯೋಜನೆಯಲ್ಲಿ ಚಿನ್ನದ ಹೂಡಿಕೆ ಮಾಡಬಹುದು.
-ಬಾಂಡ್ ರೂಪದಲ್ಲಿರುವ ಕಾರಣ ಚಿನ್ನದ ಕಳ್ಳತನದ ಭಯವಿಲ್ಲ. ಬ್ಯಾಂಕ್ ಲಾಕರ್ನಲ್ಲಿ ಇಡುವ ಗೋಜು ಕೂಡ ಇರುವುದಿಲ್ಲ.
-ಗೋಲ್ಡ್ ಬಾಂಡ್ ಮೇಲೆ ಹೂಡಿಕೆ ಮಾಡಿದರೆ ವಾರ್ಷಿಕವಾಗಿ 2 ಹಂತದಲ್ಲಿ ಬಡ್ಡಿಯೂ ಸಿಗುತ್ತದೆ. ಕೇಂದ್ರ ಸರ್ಕಾರ ಇದಕ್ಕೆ ಭದ್ರತೆ ಒದಗಿಸುತ್ತದೆ.
-ಈಗ ಹೂಡಿಕೆ ಮಾಡಿದರೆ ಬಾಂಡ್ ಮೆಚ್ಯೂರಿಟಿಯಾಗುವ ಸಂದರ್ಭದಲ್ಲಿ ಆಗಿನ ಚಿನ್ನದ ಮೊತ್ತ ನಿಮ್ಮ ಖಾತೆಗೆ ಬರುತ್ತದೆ.
-ಈ ಯೋಜನೆ 8 ವರ್ಷದ್ದಾಗಿದ್ದು, 5 ವರ್ಷಗಳ ಬಳಿಕ ಯೋಜನೆಯಿಂದ ಹೊರ ಬರಬಹುದು.