Pds Rice: ಹೊನ್ನಾಳಿಯಲ್ಲಿ ಬೃಹತ್ ಪಡಿತರ ಅಕ್ಕಿ ಕಾಳಸಂತೆ ದಂಧೆ ಪತ್ತೆ: ಅಧಿಕಾರಿಗಳನ್ನು ನೋಡಿ ಲಾರಿ ಬಿಟ್ಟು ಓಡಿಹೋದ ಚಾಲಕ!

ದಾವಣಗೆರೆ, ಹೊನ್ನಾಳಿ:(PDS rice) ಬಡವರಿಗೆ ವಿತರಿಸಬೇಕಿದ್ದ ಸರ್ಕಾರಿ ಪಡಿತರ ಅಕ್ಕಿಯನ್ನು ಅಕ್ರಮವಾಗಿ ಸಾಗಿಸುತ್ತಿದ್ದ ಬೃಹತ್ ದಂಧೆಯನ್ನು ಆಹಾರ ಮತ್ತು ಪೊಲೀಸ್ ಇಲಾಖೆ ಅಧಿಕಾರಿಗಳು ಜಂಟಿ ಕಾರ್ಯಾಚರಣೆ ನಡೆಸಿ ಹೊನ್ನಾಳಿ-ನ್ಯಾಮತಿ ಮುಖ್ಯ ರಸ್ತೆಯ ಕೋರ್ಟ್ ಕ್ರಾಸ್ ಬಳಿ ಪತ್ತೆ ಹಚ್ಚಿದ್ದಾರೆ.

ವಶಪಡಿಸಿಕೊಂಡ ಸ್ವತ್ತುಗಳ ವಿವರ
ಜಪ್ತಿಯಾದ ಅಕ್ಕಿ: ಸಾರ್ವಜನಿಕ ವಿತರಣಾ ವ್ಯವಸ್ಥೆಗೆ (PDS) ಸೇರಿದ ಸುಮಾರು 67.17 ಕ್ವಿಂಟಾಲ್ (131 ಚೀಲಗಳು) ಪಡಿತರ ಅಕ್ಕಿ.

ಅಂದಾಜು ಮೌಲ್ಯ: ಜಪ್ತಿಯಾದ ಅಕ್ಕಿಯ ಮೌಲ್ಯ ₹1,54,491 ಹಾಗೂ ಸಾಗಾಟಕ್ಕೆ ಬಳಸಿದ್ದ ಟಾಟಾ ಕ್ಯಾಂಟರ್ ಗೂಡ್ಸ್ ಲಾರಿಯ (KA-17-D-5901) ಮೌಲ್ಯ ಸುಮಾರು ₹10,00,000.

ಆರೋಪಿ:ಹೊನ್ನಾಳಿ ಟೌನ್ ನಿವಾಸಿ, ಲಾರಿ ಚಾಲಕ ನಿರಂಜನ್ (ಸದ್ಯ ತಲೆಮರೆಸಿಕೊಂಡಿದ್ದಾನೆ).

ಕಾರ್ಯಾಚರಣೆ ನಡೆಸಿದ ಅಧಿಕಾರಿಗಳು: ಹೊನ್ನಾಳಿ ತಾಲೂಕು ಕಚೇರಿಯ ಆಹಾರ ನಿರೀಕ್ಷಕರಾದ ಆತ್ರೇಯ ಪುರಾಣಿಕ್ ಎಸ್.ಆರ್., ಆಹಾರ ಶಿರಸ್ತೇದಾರ್ ಸಂಜಯ್ ಬಾಗೇವಾಡಿ ಹಾಗೂ ಹೊನ್ನಾಳಿ ಪೊಲೀಸ್ ಠಾಣೆಯ ಪಿ.ಎಸ್.ಐ ಗುರುಶಾಂತಯ್ಯ ಮತ್ತು ಸಿಬ್ಬಂದಿ.

ಕಾರ್ಯಾಚರಣೆ ನಡೆದಿದ್ದು ಹೇಗೆ?
ಹೊನ್ನಾಳಿ ಹ್ಯಾಂಡ್ ಪೋಸ್ಟ್ ಕಡೆಯಿಂದ ಹೊನ್ನಾಳಿ ಪಟ್ಟಣದ ಕಡೆಗೆ ಹಳದಿ ಬಣ್ಣದ ನಂಬರ್ ಪ್ಲೇಟ್ ಉಳ್ಳ ಟಾಟಾ ಕ್ಯಾಂಟರ್ ಲಾರಿಯಲ್ಲಿ ಅಕ್ರಮವಾಗಿ ಪಡಿತರ ಅಕ್ಕಿ ಸಾಗಿಸಲಾಗುತ್ತಿದೆ ಎಂಬ ಖಚಿತ ಮಾಹಿತಿ ಮೇರೆಗೆ ಆಹಾರ ನಿರೀಕ್ಷಕ ಆತ್ರೇಯ ಪುರಾಣಿಕ್ ಮತ್ತು ಆಹಾರ ಶಿರಸ್ತೇದಾರ್ ಸಂಜಯ್ ಬಾಗೇವಾಡಿ ಅವರು ಕೋರ್ಟ್ ಕ್ರಾಸ್ ಬಳಿ ಕಾಯುತ್ತಿದ್ದರು.ಸಂಜೆ 6:30 ರ ಸುಮಾರಿಗೆ ಬಂದ ಲಾರಿಯನ್ನು ತಡೆದು ಪರಿಶೀಲಿಸಿದಾಗ, ತಾಡಪಾಲು ಮುಚ್ಚಿದ್ದ ಲಾರಿಯಲ್ಲಿ 131 ಬಿಳಿ ಪ್ಲಾಸ್ಟಿಕ್ ಚೀಲಗಳಲ್ಲಿ ಪಡಿತರ ಅಕ್ಕಿ ಇರುವುದು ಕಂಡುಬಂದಿದೆ. ಚಾಲಕ ನಿರಂಜನ್‌ನನ್ನು ವಿಚಾರಿಸಿದಾಗ, ಹಳ್ಳಿ ಹಳ್ಳಿಗಳಲ್ಲಿ ಸಾರ್ವಜನಿಕರಿಂದ ಅಕ್ಕಿ ಸಂಗ್ರಹಿಸಿ ಹೆಚ್ಚಿನ ಲಾಭಕ್ಕೆ ಕಾಳಸಂತೆಯಲ್ಲಿ ಮಾರಾಟ ಮಾಡಲು ಯಾವುದೇ ಪರವಾನಗಿ ಇಲ್ಲದೆ ಒಯ್ಯುತ್ತಿರುವುದಾಗಿ ಒಪ್ಪಿಕೊಂಡಿದ್ದಾನೆ.

ಸ್ಥಳದಲ್ಲೇ ಲಾರಿ ಬಿಟ್ಟು ಕಾಲ್ಕಿತ್ತ ಚಾಲಕ
ಸಂಜೆ 7:00 ಗಂಟೆಗೆ ಹೊನ್ನಾಳಿ ಪೊಲೀಸ್ ಠಾಣೆಯ ಪಿ.ಎಸ್.ಐ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ತಲುಪುತ್ತಿದ್ದಂತೆಯೇ, ಚಾಲಕ ನಿರಂಜನ್ ಲಾರಿಯನ್ನು ಸ್ಥಳದಲ್ಲೇ ಬಿಟ್ಟು ಓಡಿ ಹೋಗಿದ್ದಾನೆ.

ವಶಪಡಿಸಿಕೊಂಡ ಅಕ್ಕಿಯನ್ನು ತೂಕ ಮಾಡಿಸಿ, ಸುರಕ್ಷತೆಯ ದೃಷ್ಟಿಯಿಂದ ಹೊನ್ನಾಳಿ APMC ಯಲ್ಲಿರುವ KFCSC ಸಗಟು ಮಳಿಗೆಯ ಗೋದಾಮಿನಲ್ಲಿ ತಾತ್ಕಾಲಿಕವಾಗಿ ಇರಿಸಲಾಗಿದೆ. ಈ ಸಂಬಂಧ ಹೊನ್ನಾಳಿ ಪೊಲೀಸ್ ಠಾಣೆಯಲ್ಲಿ ‘ಅಗತ್ಯ ವಸ್ತುಗಳ ಕಾಯ್ದೆ 1955’ ರ (Essential Commodities Act) ಕಲಂ 3, 6(A), 7 ರ ಅಡಿಯಲ್ಲಿ ಪ್ರಕರಣ (ಗುನ್ನೆ ನಂ. 224/2026) ದಾಖಲಾಗಿದ್ದು, ಪೋಲಿಸರು ಲಾರಿಯನ್ನು ಜಪ್ತಿ ಮಾಡಿ, ತಲೆಮರೆಸಿಕೊಂಡಿರುವ ಚಾಲಕನಿಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ.