ಸಾರ್ವಜನಿಕರ ಬಲಿಗಾಗಿ ಕಾದಿರುವ ಆನಗೋಡು ನಾಡಕಚೇರಿ

ದಾವಣಗೆರೆ : ಜಿಲ್ಲಾ ಕೇಂದ್ರದಿಂದ 15 ಕಿಲೋಮೀಟರ್ ದೂರವಿದ್ದು, ರಾಷ್ಟ್ರೀಯ ಹೆದ್ದಾರಿಗೆ ಹೊಂದಿಕೊಂಡಿರುವ ಆನಗೋಡು ನಾಡಕಚೇರಿಯ ಸ್ಥಿತಿ ಚಿಂತಾಜನಕವಾಗಿದ್ದು, ಸ್ಥಳೀಯ ಶಾಸಕರು, ಸಚಿವರು, ಜಿಲ್ಲಾಡಳಿತ ಇದರ ಬಗ್ಗೆ ಗಮನ ಹರಿಸದೇ ಇರುವುದು ಮಾತ್ರ ವಿಷಾದನೀಯ.

ಈ ನಾಡಕಚೇರಿ ವ್ಯಾಪ್ತಿಯಲ್ಲಿ 2 ಹೋಬಳಿಗಳು ಬರಲಿದ್ದು, 16 ಗ್ರಾಮ ಪಂಚಾಯತಿಯ 48 ಕಂದಾಯ ಗ್ರಾಮಗಳು ಹಾಗೂ ಇನ್ನಿತರ ಸೇರಿ ಒಟ್ಟು 65 ಗ್ರಾಮಗಳು ಇದರ ವ್ಯಾಪ್ತಿಗೆ ಬರಲಿದೆ, ಸುಮಾರು ಒಂದು ಲಕ್ಷ ಜನಸಂಖ್ಯಾ ವ್ಯಾಪ್ತಿಯ ಈ ನಾಡಕಚೇರಿ ಸ್ಥಿತಿ ನೋಡಿದರೆ, ಭವಿಷ್ಯ ಈ ನಾಡಕಛೇರಿಯ ವ್ಯಾಪ್ತಿಯ ಅತಿ ಕಡುಬಡವರ ಮನೆಯು ಕೂಡ ಈ ನಾಡಕಚೇರಿ ಗಿಂತ ಚೆನ್ನಾಗಿದೆ ಎನ್ನಬಹುದು.

ಸಚಿವರು ಮುಖ್ಯಮಂತ್ರಿಗಳು ಇದೇ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಪ್ರತಿನಿತ್ಯ ಸಂಚರಿಸುತ್ತಿತ್ತು ಒಮ್ಮೆಯಾದರೂ ಈ ನಾಡಕಚೇರಿಯ ಕಡೆ ನೋಡಿದ್ದಾರೆ, ನೂತನ ಕಟ್ಟಡ ನಿರ್ಮಿಸುವ ಮನಸಾದರೂ ಮಾಡುತ್ತಿದ್ದರೇನೋ ಎನಿಸುತ್ತದೆ.

ಉಪ ತಹಶೀಲ್ದಾರ್ ಸೇರಿದಂತೆ 6 ಸಿಬ್ಬಂದಿಗಳನ್ನು ಹೊಂದಿರುವ ಈ ನಾಡಕಚೇರಿಯ ಕಟ್ಟಡ ಸ್ವತಂತ್ರ ಪೂರ್ವದ ಕಟ್ಟಡವಾಗಿದ್ದು, ಯಾವುದೇ ಕ್ಷಣದಲ್ಲಾದರೂ ಸಾರ್ವಜನಿಕರ, ಸಿಬ್ಬಂದಿಯ ಮೇಲೆ ಬಿದ್ದರೂ ಆಶ್ಚರ್ಯವಿಲ್ಲ. ಈ ಕಟ್ಟಡಕ್ಕೆ ಕಿಟಕಿಗಳಿಲ್ಲ, ಬಾಗಿಲುಗಳು ಭದ್ರವಿಲ್ಲಾ, ಇಲ್ಲಿಗೆ ಬರುವ ಸಾರ್ವಜನಿಕರಿಗೆ ನಿಲ್ಲಲು ಸಹ ಸೂಕ್ತ ಸ್ಥಳವಿಲ್ಲದೆ ಪರದಾಡುತ್ತಿರುವುದು ಮಾತ್ರ ಸರ್ಕಾರಕ್ಕೆ ಸಾರ್ವಜನಿಕರ ಮೇಲಿರುವ ಕಾಳಜಿಗೆ ಹಿಡಿದ ಕೈಗನ್ನಡಿಯಾಗಿದೆ.